Dam na Curaçao
Debí na e klima semi-árido di Kòrsou, maneho di awa di áwaseru tabata un nesesidat pa e West-Indische Compagnie e tempu ei (for di siglo diessiete). E áwaseru promedio ta 500 mm pa aña, pero e suela di Kòrsou no ta retené awa bon.
A konstruí henter un sistema di faha (damnan di piedra abou) stratégikamente den e vayenan i roinan grandi riba e isla pa promové filtrashon di e awa presioso den e tera. Te ainda klaramente por mira un sistema asina na loke antes tabatá plantashi Ascencion. E meta tabata pa redusí e velosidat di e korida di awa i asina limitá eroshon. Mientras e sedimento fértil ta haña chèns di sak i a keda atras. Huntu ku esakinan e perkolashon den e suela tambe ta oumentá.
E bareranan abou akí pa wanta awa, tambe a yuda ku e awa ta permanesé menos tempu riba tera, loke a limitá e mortalidat di palunan di fruta. E revolushon industrial a trese mashinnan pisá, i esakinan a fomentá konstrukshon di damnan grandi i haltu di tera, tur esaki a kosto di e fahanan. Na plantashi Kas Koraal di antes tambe e damnan bieu a traha kaminda pa damnan di tera.
E damnan den Kabouterbos
E damnan den Kabouterbos i pegá den e área ta data di promé ku e Segundo Guera Mundial. Esaki tabata un área pa fangu awa, ku tabata kai bou di e ‘landswatervoorziening’ di e tempu ei. E área ta yega te na e tereno na Reigerweg. En realidat, e área di desague enorme aki ta kaba den Schottegat entre Pos Kabai i Groot Davelaar. E área ta risibí mayoria di su awa for di Granbeeuw, Sapateer, Vetter i Jongbloed. Durante guera tabatin un unidat di militar aki ku ‘halftracks’ ku nan a mantené aki. Tambe nan mester a vigilá e área di fangu awa. Durante e Segundo Guera Mundial tabatin un kunuku eksperimental akí pa planta bèrdura i otro kos pa suministro di kuminda di e isla. Despues di guera esaki no tabata nesesario mas i e kunuku akí a bira un hardin botaniko i despues un parke di bestia. Te na 1963 numa, a establesé e servisio di LVV. E maneho di e damnan ta kai bou di departamento di Ministerio di Salubridat Públiko, Medio Ambiente i Naturalesa.