Kadushi (Candelabra cactus)
Cereus repandus
E kadushi ta un kaktus di kolumna ku por krese entre 6 ku 10 meter haltu. Den algun kaso asta 12 meter haltu. E tronkon di e kadushi ta parse un tronkon di pal’i mata i por alkansá un diameter di 40-45 centimeter. E kadushi akí, tras di e kòdigo QR, ta mas òf menos 75 aña bieu! Animalnan ta usa e parti será, forma di kandelabro pa traha nèshi. E fruta di e kadushi yamá tampaña. E ta komibel pa hende i e ta masha popular serka paranan manera e prikichi. Ta difísil pa distinguí e kadushi for di un otro kaktus di kolumna ku yama datu.
Ta usa un brasa yòn pa traha e plato tradishonal sòpi di kadushi. Ta saka e sinta bèrdè di klorofil for bou di e brasa su kaska pafó i bati’é te ora e bira moli i fini. Karni salgá, piská, karkó i kabaron seku tambe ta bai den e sòpi, sirbí ku funchi.
E espesie spesífiko di kaktus akí ta aparesé na e islanan den Karibe i den un parti di Surameríka.
Trupial / Oranje Troepiaal / Troupial
Icterus icterus
E trupial ta un para remarkabel ku ta komun na Kòrsou. Su kanto riku i melodioso hopi biá ta un di e promé zonidonan ku bo ta tende mainta. Su koló oraño briante ta hasié mashá notabel ora e ta sintá riba kaktus, palu òf mata.
Trupial adulto tin plumahe oraño briante ku áreanan pretu kontrastante riba kabes, garganta i alanan. Nan ta krese te mas òf menos 24 cm. E para yòn tin un koló un poko mas hel, p’esei tin biá ta konfundié ku e para trupial kachó. Trupial adulto ta un animal teritorial i lo defendé su teritorio ferosmente kontra intrusonan. Nan komportashon impreshonante kombiná ku hasiment’i boroto ta hasi esaki un espektákulo spesial.
E trupial ta kome fruta, insekto, webu i tin biá asta para yòn di otro espesie. E ta preferá traha nèshi den kadushi haltu, pero debesenkuando e sa hòrta nèshi di otro para!
Bo ta haña e trupial riba e islanan Aruba, Boneiru i Kòrsou i tambe den partinan nòrt di Surameríka manera Venezuela i Colombia. E ta sintié mas na kas den áreanan seku i habrí ku hopi mata di sumpiña i kaktus. Pa mas informashon https://ebird.org/species/ventro1/CW
